Linz, Bundesstaatl. Studienbibl., Cod. 466 (125)

Kremsmünster, um 1160 (vor 1167)


An den Kanon anschließende Gebete (72r-73r)

{Quando miscetur corpus sanguine dic:} Fiat commixtio et consecratio corporis et sanguinis domini nostri Iesu Christi omnibus sumentibus salus mentis et corporis et ad vitam aeternam capescendam praeparatio salutaris. Per eundem Christum dominum nostrum.
{Ad dandum osculum:} Domine Iesu Christe, qui dixisti apostolis tuis: Pacem meam do vobis, pacem relinquo vobis: ne respicias peccata mea, sed fidem ecclesiae; eamque secundum tuam voluntatem pacificare et adunare digneris. Qui cum Deo.
{Quando osculatur dicat:} Habete vinculum pacis et caritatis, ut apti sitis sacrosanctis mysteriis. Pax tecum.
{Oratio ad sumendum corpus dominicum.} Domine Iesu Christe, fili Dei vivi, qui ex voluntate patris, cooperante Spiritu sancto, per mortem tuam mundum vivificasti, libera me et munda me miserum per hoc sacrosanctum corporis et sanguinis tui mysterium a cunctis iniquitatibus meis et ab universis malis meis: et fac me tuis semper oboedire mandatis, et a te numquam in perpetuum separari. Salvator. -- {Oratio ad eucharistiam.} Domine sancte, pater omnipotens, aeterne Deus, da mihi hoc corpus et sanguinem Iesu Christi filii tui ita sumere, ut per hoc merear remissionem peccatorum accipere et Spiritu sancto repleri, quia tu es Deus et praeter te non est alius, cuius gloriosum nomen permanet in saecula saeculorum. Amen.
{Alia.} Perceptio corporis et sanguinis tui, domine Iesu Christe, quam indignus sumere praesumo, non mihi proveniat in iudicium et condemnationem: sed pro tua pietate prosit mihi ad tutamentum mentis et corporis. Per te salvator mundi.
{Expleta missa dicat:} Placeat tibi, sancta trinitas, obsequium servitutis meae, et praesta, ut sacrificium, quod oculis tuae maiestatis indignus obtuli sit tibi placens mihique et omnibus pro quibus illud obtuli sit te miserante propitiabile. Per. -- Meritis et intercessionibus istorum atque omnium sanctorum suorum misereatur nostri omnipotens et misericors dominus. Amen.


Alois Haidinger, 7. Juli 1997