Stuttgart, Württembergische Landesbibl., Cod. bibl. 2° 20

Kremsmünster, gegen Mitte 12. Jh. (nach 1135)


An den Kanon anschließende Gebete (86r-87v)

{Post orationem dominicam cum dixerit Pax domini misceatur corpus dominico sanguini et dicat secrete:} Haec sacrosancta commixtio corporis et sanguinis domini nostri Iesu Christi fiat omnibus sumentibus salus mentis et corporis et ad aeternam vitam capescendam praeparatio salutaris. -- {Alia:} Fiat commixtio et consecratio corporis domini nostri Iesu Christi omnibus accipientibus nobis in vitam aeternam, Amen. -- {Alia:} Sancti sanguinis commixtio cum sancto corpore domini nostri Iesu Christi prosit omnibus sumentibus ad vitam aeternam.
{Tunc osculetur altare domini et dicat:} Domine Iesu Christe, qui dixisti apostolis tuis: Pacem meam do vobis, pacem relinquo vobis: ne respicias peccata mea, sed fidem ecclesiae eamque secundum tuam voluntatem pacificare et adunare digneris.
Habete vinculum caritatis et pacis, ut apti sitis sacrosanctis mysteriis Christi. -- Pax Christi et ecclesiae abundet in cordibus nostris. (Hs: vestris!)
{Antequam communicet sacerdos dicat hanc orationem:} Panem caelestem accipiam et nomen domini invocabo.
{Ad corpus dominicum sumendum:} Perceptio corporis tui, domine Iesu Christe, quam indignus sumere praesumo, non mihi proveniat in iudicium et condemnationem: sed pro tua pietate prosit mihi ad tutamentum mentis et corporis.
{Ad calicem accipiendum:} Quid retribuam domino? Calicem salutaris. Laudans invocabo dominum. -- {Ad calicem:} Communicatio et confirmatio corporis et sanguinis domini nostri Iesu Christi prosit mihi in remissionem omnium peccatorum meorum et conservet me in vitam aeternam.
{Item oratio ad utrosque:} Domine sancte, pater omnipotens et aeterne Deus, da mihi hoc corpus et sanguinem filii tui, ita sumere, ut per hoc merear remissionem peccatorum accipere et tuo sancto Spiritu repleri, quia tu es Deus et praeter te non est alius, cuius gloriosum nomen permanet in saecula saeculorum, Amen. -- {Alia:} Domine Iesu Christe, fili Dei vivi, qui ex voluntate patris cooperante Spiritu sancto per mortem tuam mundum vivificasti, libera me per hoc sacrificium a cunctis iniquitatibus et universis malis et fac me tuis oboedire mandatis et a te numquam in perpetuum separari. Per.
{Cum coeperit populus communicare dicat presbiter orationem:} Perceptio corporis domini nostri Iesu Christi prosit animae tuae et corporis tuo in vitam aeternam, Amen. -- {Item sacerdos dicat:} Corpus et sanguis domini nostri Iesu Christi prosit tibi in remissionem omnium peccatorum tuorum ad vitam aeternam, Amen. -- {Si solus presbiter communicet, dicat post communionem:} Corpus tuum, domine Iesu Christe, quem ego miser accepi et sanguis, quem indignus sumere praesumpsi, adhaereat animae et corpori meo ad indulgentiam delictorum meorum, et praesta, omnipotens Deus, ut ibi non sit macula peccati, ubi intraverunt sancta sacramenta. Per te Iesu Christe, qui. -- {Et si alii communicant cum eo dicat hanc orationem:} Concede, domine Iesu Christe, ut sicut haec sacramenta corporis et sanguinis tui fidelibus tuis ad remedium contulisti, ita mihi indigno famulo tuo et omnibus sumentibus per me haec sacramenta non obsint ad reatum sed prosint ad veniam omnium peccatorum nostrorum. Qui vivis et.
{Finita missa dicat:} Sit nomen domini benedictum. Exsultabunt sancti in gloria. Praetiosa in conspectu domini. -- Sancta Maria, mater domini nostri Iesu Christi, isti et omnes sancti et electi Dei intercedere dignemini pro nobis peccatoribus ad dominum Deum patrem omnipotentem, ut mereamur ab eo adiuvari et sanari. Qui vivit. In suo sancto servitio confortet nos omnipotens et misericors dominus, Amen. -- {....} Et Benedictio Dei patris omnipotentis et filii et Spiritus sancti descendat et maneat super vos. -- {.....} Placeat tibi, sancta trinitas, obsequium servitutis meae, et praesta, ut sacrificium, quod oculis tuae maiestatis indignus obtuli, sit tibi placens mihique et omnibus pro quibus illud obtuli sit te miserante propitiabile. Per. -- {....} Meritis et intercessionibus omnium sanctorum suorum salvet et benedicat nos omnipotens dominus, Amen. -- Trium puerorum...


Alois Haidinger, 7. Juli 1997